Música en Rede va ser un puntu d’alcuentru profesional y comercial pa reunir a los axentes del sector y espertos de distintos ámbitos

24/03/24.- El Principáu va organizar los próximos 16, 17 y 18 d'abril les primeres xornaes Música en Rede, Alcuentru Profesional, una amuesa sectorial dedicada a la industria musical asturiana. L'alcuentru, que se va facer en Llaboral Ciudá de la Cultura, plantégase como un puntu d'alcuentru profesional y comercial p’axuntar a los axentes del sector musical y a espertos de distintos ámbitos.

Nesti sentíu, la conseyera de Cultura, Política Llingüística y Deporte, Vanessa Gutiérrez, esplica que l'oxetivu pasa per “amosar el talentu de los nuestros artistes de la que se xeneren espacios d'alderique y se favorecen nueves dinámiques de collaboración y desenvolvimientu”. Gutiérrez asegura que'l Principáu quier “abordar de la mano del sector temes del so interés p’ayudar a visibilizalu y profesionalizalu”. Pa ello, esplica la conseyera, Música en Rede “va cuntar con espertos de distintos ámbitos y procedencies xunto a una significativa participación d'artistes asturianos”.

La primer edición de l'amuesa va tener una programación diversa que se va dividir en secciones pa fomentar la interacción ente artistes, profesionales y públicu. Asina, la sección Erbíes va constar de cinco sesiones formatives a manera de talleres especializaos que van abordar aspectos clave como l'asesoramientu llegal, programación, xestión, creación d'audiencies, sostenibilidá n'eventos y calendarios.

Col nome de Conxustes van organizase tres meses redondes que van xirar alredor del asociacionismu, internacionalización y medios de comunicación. A lo último, la sección Llabor va ufiertar 13 actuaciones en formatu exhibición y curtia duración d'artistes asturianos vinculaos a distintos estilos musicales.

En paralelu, l'amuesa va cuntar con un puntu d'asesoramientu denomináu En Rede, un alcuentru comercial llamáu Xunta y dos presentaciones curties de proyectos denomaos como Rolda. El plazu d'inscripción, tanto pal alcuentru comercial como pa les presentaciones, va siguir abiertu hasta'l 25 de marzu, ente que les y los profesionales que quieran participar en Música en Rede van poder inscribise hasta'l día 12 d'abril na páxina web https://musicaenrede.asturiesculturaenrede.es onde tamién se puede consultar tola información relativa al eventu.

Cola celebración d'esti alcuentru enfocáu na industria musical, la Conseyería de Cultura, Política Llingüística y Deporte reafirma’l so apueste por impulsar el sector cultural al traviés d'alcuentros sectoriales, llabor empezáu l'añu pasao cola amuesa d'artes escéniques, que va volver organizase nesti 2024.

La rellación de conteníos y los profesionales que van participar ye la siguiente:

• Erbíes. Talleres formativos de:
  - Desarrollo de aspectos técnicos y legales en las propuestas artísticas, con Patricia Hermida (Asociacion Galega de Empresas Musicais)
  - El papel de la persona encargada de la programación en la gestión y organización de eventos, con Germán Quimasó (Sonde3) y Jordi Lauren (PlayPlan)
  - La creación de audiencias, con Georgia Taglietti (The International Consulting Network for Arts&Culture)
  - Las herramientas público/privadas para el desarrollo de proyectos musicales sostenibles, impartida por Xavier Cester (ICEC)
  - Los calendarios y cronogramas en la producción musical, con Rómulo Sanjurjo (Jau Cultura).
• Conxustes. Meses redondes sobre:
  - Asociacionismo y profesionalización del sector, con Patricia Hermida (AGEM), Manuel Alonso (Músicas Ao Vivo), Bree Delian (Llar) y Pilar Aguilar (Sympathy for the Layer)
  - Modelos de internacionalización musical, con Lidia Hinojo (Fira Mediterrània de Manresa) y Armand Llácer (Fira Trovam)
  - Medios de comunicación y música: estado de la cuestión, con Sandra Costa (La Costa Comunicació), Bea Camiña (Produtriz Agency) y Ana Gómez de Castro (Live Nation).
• Llabor. Actuaciones de Elena del Frade, Galgo, L-R, César Latorre, Ferla Megía, Pablo Canalís, Fee Reega, Mapi Quintana, Alberto & García, José Manuel Tejedor, Algaire, Héctor Braga y Mardom.
• Puntu d’asesoramientu En Rede, nel que van participar Bea Camiña (Produtriz Agency), Patricia Hermida (AGEM), Rubén Otero (Luneda), Manuel Alonso (Músicas Ao Vivo) y Pilar Aguilar (Sympathy for the Lawyer).

Programa Música en Rede